АҚПАРАТ АҒЫНЫ
28 Қазан, 2019

«Ойтұмар» кітабы оқырманға жол тартты

Алматыда «Атакент mall» сауда кешенінде «Қазына» тек қазақ тіліндегі кітап үйінің ұйымдастыруымен ақын, драматург, композитор, «Парасат» орденінің, Тәуелсіз «Платиналы Тарлан» сыйлығының иегері Исраил Сапарбайдың «Ойтұмар» атты кітабының тұсаукесері өтті.

Кешегі Ұлы ақын Абайдың «Қара сөздері», Шерхан Мұртазаның «Бір кем дүниесі» іспетті «Ойтұмар» кітабы бүгінгі қоғамдық мәселелерді кеңінен тарқатып, адам өміріне қатысты ең қажетті ақпараттан хабар береді. Еркін форматта өткен шараны «Ана тілі» ұлт газетінің Бас редакторы Жанарбек Әшімжан ағамыз жүргізіп отырды. Іс–шараға танымал ғалымдар, ҚР Жазушылар Одағының мүшелері, ақын-жазушылар, журналистер, оқытушылар, студенттер, кітап үйі оқырмандары қатысты. Ал түркітанушы Зәріпбай Оразбай, композитор, әнші, Қазақстан халық әртісі Алтынбек Қоразбаев, Қазақстан Жазушылар одағының мүшесі, жазушы Серік Асылбекұлылар кітаптың тұсауын кесті.

«Ойтұмар» кітабының тұсаукесерінде «Президент және халық» газетінің бас редакторы Марат Тоқашбаев әдемі ақ тілегін жеткізсе, Әділбай Тобыш және Алма Аманжоловалар әсем әннен шашу шашты. Сондай-ақ, «Qazyna» жобасының жүзеге асуына тікелей мұрындық болған EDTECH.kz Халықаралық білім орталығының бас директоры, психология ғылымының кандидаты, PhD докторы Ғани Бейсембаев, «Qazyna» кітап үйінің басшысы Алмас Шәйкен сөз алып, ақын ағасының жаңа кітабымен құттықтады. Кітап оқырманға 5000 данамен жарық көрген. Шара соңында «Qazyna» кітап үйі жаңа қонысының ашылу салтанатымен жалғасты.

Исраил САПАРБАЙ, ақын, драматург, композитор: -Әлем қандай күрделі болса - әрбір адамның ішкі әлемі де сондай күрделі. Адамды таныдым деп айтудың өзі қиын. Өйткені әр адамның бойында өз қасиеті, дүниесі, жүрегі, жаны, болмысы бар-ғой. Тіпті, мен өзімді танып болған жоқпын. Бүгін шығып отырған «Ойтұмарым» толғаныстан туған дүние. Бұл кітап арқылы оқырманнан сүйінші сұрап отырғаным жоқ, тек ширек ғасыр бойы жазған еңбегімді бір көрсетейінші деген ой еді.