• Құмсағат
• 28 Сәуір, 2024

Ташкенттегі әлем кубогі: Эрика Жайлауова мен Милана Парфилова финалға шықты

Ташкентте (Өзбекстан) өтіп жатқан көркем гимнастикадан әлем кубогі кезеңінде көпсайыс аяқталып, жекелеген жаттығулар бойынша финалға шыққан спортшылар анықталды. Бұл туралы Ұлттық олимпиада комитетінің баспасөз қызметі хабарлады.

Бұл сында Қазақстан атынан Эрика Жайлауова мен Милана Парфилова және топтық жаттығудан ұлттық құрама сынға түсуде. 

Көпсайыс қорытындысы бойынша Жайлауова 7, Парфилова 11-орыннан көрінді. Екі спортшы да жекелеген жаттығулар бойынша финалға шықты. 

Эрика Жайлауова доп және ұршықпен, Милана Парфилова шығыршықпен жаттығуда жүлдеге таласады. 

Ал топтық жаттығудан Қазақстан командасы көпсайыста жетілікке еніп, екі бағдарламадан ақтық сынға түсті.