• Таным
• 07 Наурыз, 2024

Алматыда қасиетті Рамазан айында қандай іс шаралар өтеді?

Биыл Рамазан айы 11 наурызда басталып, 9 сәуірде аяқталады. Өңірлік коммуникациялар қызметінің алаңында қасиетті айды өткізу  туралы Алматы қаласының бас имамы Төлеби Оспан хабарлады.

Рамазан -  мұсылмандар ораза ұстайтын парыз айы. Бұл Исламның бес тірегінің бірі, әр сенуші үшін қасиетті дін негіздері.

Спикер ораза кезінде мұсылмандар күндізгі уақытта тамақ пен су ішуден тыйылатынын, сондай-ақ ойын-сауық пен көңіл көтеруге, алкоголь ішуге және жаман сөз айтуға тыйым салынатынын еске салды.

«Сіздерді қасиетті Рамазан айының келуімен шын жүректен құттықтаймын, бұл айды діни  сенімдегілер жыл сайын күтеді және бүкіл мұсылман қауымы асыға күтеді! Рамазан - тыйылу айы. Бұл тамақ пен сусыннан ғана емес, күнә мен зұлымдықтан бас тарту уақыты. Хадисте:«Кімде-кім  жаман  сөзі мен жаман іс-әрекеттен тыйылмаса,  оның тамақ жеуден және сусын ішуден  тыйылғанынан Алла тағалаға ешбір керегі жоқ делінген», - деді Төлеби Оспан.

Сондай-ақ, спикер Алматыда қасиетті Рамазан айын мерекелеу жоспары бекітілгенін айтты. Биылғы жылы қаланың 54 мешітінің 50-інде Құран хатым жасалып, тарауих намазы оқылады. 

Бұдан басқа, Алматының орталық мешітінде күн сайын 500 адамға арналған үлкен ифтар (ауызашар) ұйымдастырылатын «Рамазан шатыры» салынады. Сондай-ақ, жергілікті ауызашарлар қаланың басқа мешіттерінде де өткізілетін болады.

Ресми түрде ҚМДБ биылғы жылды «Ислам және дәстүр құндылығы» жылы деп жариялады, осыған байланысты қасиетті айда іс-шаралар біздің дәстүрлерімізге сәйкес өтеді.

«Ораза айы Наурыз мерекесімен сәйкес келетіндіктен, кешкі ауызашар кезінде мешіт қонақтарына наурыз көже мен бауырсақ тағамдарынан дәм тартылады. Ауызашар өтетін орындар қазақы өрнектерімен безендіріліп, Рамазан айының құрметіне «Жарапазан» орындалады, - деді Т. Оспан.

Рамазандағы ауыз бекіту  мен намаз уақытының кестесін Қазақстан мұсылмандары діни басқармасының muftyat.kz және azan.kz. сайтынан табуға болады. 

Бұдан басқа, лауазым бойынша сұрақтар, діни мәселелер туындаған жағдайда, қажетті ақпаратты Қазақстан мұсылмандары діни басқармасы жанындағы діни ақпарат беру орталығынан алуға болады. Орталық нөмірі - +7 (707) 233-30-30, WhatsApp +7 (707) 662 6561. Алматы орталық мешіті жанындағы Орталық нөмірі– +7 707 939 7708.