• АҚПАРАТ АҒЫНЫ
• 30 Наурыз, 2024

Бородулиха ауданында Эра өзенінің су деңгейі көтерілді

Бородулиха ауданы Переменовка ауылында қардың қарқынды еруі салдарынан Эра өзенінде су деңгейі көтерілді. Бұл туралы Абай облысы әкімдігі хабарлады.

Өзен арнасынан судың шығуы нәтижесінде Первомайская көшесінің бойындағы 50 аула аумағын су басқан. Үйлерге су кірген жоқ

19 адамды эвакуациялау шаралары жүргізілген болатын, оның ішінде 6 бала бар. Қазіргі таңда барлық тұрғындар үйлерінде.

Оқиға орнында Төтенше жағдайлар департаментінің, ЖАО, АПБ, орталық аудандық емхананың және АЭС күштері мен құралдарынан 44 адам және 7 техника жұмыс атқаруда.

Первомайская және Болашақ көшелері бақылауға алынған. Үйлерді су басып кетпеу үшін инертті материалдар төселуде.

ЖАО Эра өзенінде жағалауды бекіту жұмыстарын жүргізуде, барлығы 400 қап 500 тонна инертті материал төселді.

Төтенше жағдайлар қызметі үйлерді аралап, тұрғын үйлердің су баспауын тексеруде.

Талан-таражға жол бермеу және қоғамдық тәртіпті қамтамасыз ету мақсатында Бородулиха АПБ патрульдер ұйымдастырды.

Қазіргі таңда Первомайская және Болашақ көшелерінің бойында су деңгейі төмендеп, аула аумақтары мен тұрғын үйлерді су басу қаупі жоқ.

Бородулиха ауданындағы су тасқыны жағдайы ерекше бақылауда.

Фото: gov.kz