• Шартарап
• 23 Наурыз, 2024

«Гүлдер» ансамблі Түркиядағы Наурыз фестивалінде өнер көрсетті

«Гүлдер» ансамблі Түркиядағы Наурыз фестивалінде өнер көрсетті, - деп хабарлайды Мәдениет және ақпарат министрлігінің баспасөз қызметі.
Роза Бағланова атындағы «Қазақконцерт» мемлекеттік академиялық концерттік ұйымының «Гүлдер» ансамблі Түркияның Амасия қаласында өткен Наурыз фестивалінде өнер көрсетті.
Фестиваль түркі елдерінің рухани мұрасын насихаттауға бағытталған. Жыл сайын өтетін фестиваль биыл 4 күнге созылды. Қазақстаннан келген қатысушылар «Наурыз» атты басты мерекелік іс-шарада өнер көрсетті.
«Гүлдер» ансамблінің үш солисі фестивальдың концерттік бағдарламасында бірнеше хореографиялық композиция ұсынды. Олардың арасында Анвара Садықова мен Алмат Шәмшиев  көрерменнің көңілінен шыққан  «Қара жорға», «Алтынай», «Көңіл толқыны», «Мен қазақтың қызымын», «Жетісуым», «Тоқымқағар», «Ермек» би композицияларын қойды. Ұжым мүшелері аталған композицияларды жеке, дуэт және триомен орындады.
Сондай-ақ фестиваль аясында «Гүлдер» ансамблінің бас балетмейстері Анвара Садықова фестиваль қатысушылары мен жергілікті әртістер үшін қазақ биі бойынша шеберлік сабағын өткізді.