Ж. Түймебаев сәулет саласының мамандарымен кездесті

118

Түркістан облысының әкімі Жансейіт Түймебаев сәулет саласына қатысты мамандармен бейресми кездесу өткізді. Құрамында Қазақстанның халық суретшісі Ерболат Төлепбай, ҚР Сәулетшілер Одағының вице-президенті Бақытжан Әшірбаев, облыстық сәулет және қала құрылысы басқармасының басшысы Еркін Жүсіпов және облыстық құрылыс басқармасының басшысы Тоқтар Үсібалиев сынды бірқатар азаматтар бар жұмыс тобы Түркістан қаласының бас жоспарында қамтылатын нысандардың орналасу тәртібін, сәулеттік келбетінің ерекшеліктерін талқылады. Бұл туралы облыс әкімінің баспасөз қызметі хабарлайды. Үш бағыт бойынша, атап айтқанда, Қ.А.Яссауи мавзолейі мен «Әзірет Сұлтан» мемлекеттік қорық мұражайының маңында салынатын құрылыс нысандары, сонымен бірге, әкімшілік-іскерлік орталығын салу бағыттары бойынша дамитын облыс орталығындағы жобалардың нақты орналасу орындарын талқылаған мамандар аталған жұмыстарға қосымша Түркістан қаласындағы жолдарды да реттеуді жоспарға қосты. Белгілі сәулетшілер шаһарда айналма жолдар салып, қаланың инфрақұрылымын дамытуды және сәулетін одан әрі көркейтуді жоспарлауда. Атқарылып жатқан жұмыстардың барысына көңілі толған аймақ басшысы облыстық сәулет және қала құрылысы басқармасының басшысы Е.Жүсіповке сәулеттік жұмыстарды халықаралық деңгейдегідей сапалы етіп дайындап, мерзімінде тапсыруды жүктеді.  Айта кетерлігі, бүгінгі таңда Түркістанда ұзындығы 764 шақырымды құрайтын 875 көше, «Батыс Еуропа-Батыс Қытай» дәлізі аясында салынып, қалаға тиесілі болған 12 шақырымдық бір ғана айналма жол бар. Түркістан шаһарын дамыту туралы тұжырымдаманың басты мақсаты — тарихи-мəдени жəне рухани мұраның сақталуын қамтамасыз ететін түркі əлемінің орталығы ретінде қаланы одан əрі дамытудың негізгі бағыттарын айқындау, Түркістанды маңызды өңірлік даму орталығы етіп қалыптастыру болып табылады.




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *