• Айна
• 20 Қаңтар, 2024

Еліміздегі ақылы 17 жолдан 30 млрд теңгеден астам қаржы түсті

Өткен жылы еліміздегі ақылы 17 жолдан 30 млрд теңгеден астам қаржы түсті. Бұл туралы «ҚазАвтоЖол» ұлттық компаниясынан мәлім етті.

«2023 жылы ақылы 17 жолдан жүргізушілер тарапынан 30 283 900 мың теңге ақша қаражаты түсті», - делінген компанияның агенттік сауалына берген жауабында.

Мекеме мәліметінше, аталған қаражат ақылы жолдарды күтіп ұстауға және ағымдық жөндеу жұмыстарына, ақы алу жүйесін күтіп ұстауға, инвестицияларды қайтаруға, жол пайдалану техникасы мен жабдықтар сатып алуға жұмсалады.

«Жылдық аудит есебі жүргізілгеннен кейін таза кіріс анықталады. Оның 80 пайызы республикалық бюджетке төленіп, қалған 20 пайызы жол саласын дамыту үшін «ҚазАвтоЖол» ҰК» АҚ-та қалады», - деп нақтылайды компаниядан.