• УЙҒУР АВАЗИ
• 11 Мамыр, 2010

Мукапатлар — ветеранларѕа

Йеқинда А.Розибақиев намидики 153-мәктәп-гимназияниң устазлири билән оқуғучилири «Достық» микрорайонида истиқамәт қилидиған уруш вә әмгәк ветеранлири билән учришиш өткүзди.

Мәктәпниң һойлисиға жиғилған ветеранларни Әвезов наһийәлик өзини өзи башқуруш кеңишиниң рәиси Миршат Баратов, Алмута шәһәрлик вә Алмута вилайәтлик һәрбий комиссариниң орунбасари, полковник Талғат Җәлилов, Әвезов наһийәси «Достық» микрорайони Ветеранлар кеңишиниң рәиси Мердали Турсунов, мәзкүр мәктәп-гимназияниң мудири Шавкәт Өмәров вә башқилар Ғалибийәт мәйрими билән сәмимий тәбрикләп, уларға мустәһкәм саламәтлик, аиләвий хатирҗәмлик тилиди. Андин ветеранлар мәйдисигә «1941 — 1945-ж.ж. Ұлы Отан соғысындағы жеңіске 65 жыл» юбилейлиқ хатирә» медали тақалди.

Шуниңдин кейин ветеранлар мәктәп-гимназия оқуғучилири тәрипидин тәйярланған концерт программисини тамашә қилип, солдат кашисиға еғиз тәгди.

Бәхтишат СОПИЕВ.

***

Улуқ Ғалибийәтниң 65 жиллиғиға мунасивәтлик Панфилов наһийәси бойичә 1139 адәм юбилейлиқ медальлар һәм ахчилиқ мукапатлар билән тәғдирләнди. Мукапатланғанлар асасән беваситә җәңләргә қатнашқан вә арқа сәптә әстаидил әмгәк қилған ветеранлар һәм вапат болған сабиқ җәңчиләрниң рәпиқилиридин ибарәт болуп, һеч ким бу һөрмәт-илтипаттин чәттә қалмиди. Җүмлидин Яркәнт шәһәрлик округ бойичә 553 адәм мошундақ шәрәпкә муйәссәр болди. Уларниң арисида Алим Зайитов, Гайит Зайитов, Һесамдун Самиев, Сидиқ Кәримов, Имәр Нурәхмәтов охшаш уруш ветеранлири, Гүлбанум Әхтәмова, Турсунай Йүсүпова, Турсун Самсақов, Мәрийәм Мөрдинова, Санийәм Босақова, Һашим Һасанов, Қәмирдин Яқупов, Банум Мәсимова, Имин Мәңсүров вә башқиму Улуқ Ғалибийәткә арқа сәптә өз һәссисини қошқан онлиған әмгәк ветеранлири бар.

Мукапитиңлар мубарәк болсун, һөрмәтлик мөтивәрләр!

Нурәхмәт ӘХМӘТОВ.

Панфилов наһийәси.

***

Чонҗа йезисиниң Мәдәнийәт өйидә мошу йеза округида истиқамәт қилидиған Улуқ Вәтән уруши ветеранлири билән 1941 — 1945-жиллири арқа сәптә кечә вә күндүз тәр төкүп әмгәк қилғанларға уруш вә әмгәк ветеранлириға «1941 — 1945-ж.ж. Ұлы Отан соғысындағы Жеңіске 65 жыл» юбилейлиқ хатирә медальлирини тапшуруш мәрасими болуп өтти.

Мәрасимда наһийә һакими Көйүмчан Өмәров жиғилғанларни шанлиқ сәнә билән сәмимий тәбрикләп, мөтивәрләргә, нураний аниларға мустәһкәм саламәтлик тилиди. Андин һәр бир ветеранниң алдиға берип, мәйдисигә медаль тақиди вә гүлләр тәғдим қилди.

Умумән, наһийә бойичә 1278 адәм мошу медальға сазавәр болди.

Нурмәһәммәт ИХАЗОВ.

Уйғур наһийәси.

***

Улуқ Ғалибийәтниң 65 жиллиғи мунасивити билән Маливай йезисидики бир топ ветеранларни «1941 — 1945 ж.ж. Ұлы Отан соғысындағы Жеңіске 65 жыл» юбилейлиқ медали билән мукапатлаш мәрасими болуп өтти. Униңда округ һакими Еркинбек Давутқулов билән Уйғур мәдәнийәт мәркизи йезилиқ шөбисиниң рәиси Бәкрим Сабитов Маливай йезисидин 68 уруш вә әмгәк ветераниниң мошу медаль билән мукапатланғинини хәвәр қилди. Мәрасимда жут мөтивәрлири — йезилиқ ақсақаллар кеңишиниң рәиси Әмәт Зайиров, чоң жигит беши Пәрһат Үсәнов, ақсақаллар кеңишиниң әзаси Мекебай Қурбанбаевлар мукапат егилирини Улуқ Ғалибийәтниң 65 жиллиғи мәйрими билән тәбриклиди.

Мәһәмәтҗан ҺАПИЗОВ.

Әмгәкчиқазақ наһийәси.