• УЙҒУР АВАЗИ
• 17 Мамыр, 2010

Бизниң қәһриманлар

Мәсим ЯҚУПОВ

(1914 — 1974)

Алмута шәһиридә туғулған. Ата-анисидин төрт йешида житим қелип, балилар өйидә тәрбийилиниду. 1941-жили җәң мәйданиға атлинип, қәһриманлиқниң әҗайип үлгисини көрситиду. Амма мукапатқа тәвсийә қилинған һөҗҗәттә исми хата йезилип қалғанлиғи сәвәвидин, у өз вақтида мукапатни елишқа муйәссәр болмайду. Пәқәт аридин хелә жил өткәндин кейин, йәни 1952-жили униңға СССР Алий Кеңиши Президиуминиң 1943-жилдики Пәрманиға мувапиқ Ленин ордени вә «Алтун Юлтуз» медали тапшурулуп, Кеңәш Иттипақиниң Қәһримани атиғиға муйәссәр болиду.

Һазир Алмута шәһиридики илгәрки Электротехническая кочиси вә 101-мәктәп-гимназия униң нами билән атилиду.

Сүлһи ЛУТФУЛЛИН

(1923 — 1991)

Яркәнт шәһиридә туғулған. Қари Босақов намидики мәктәптә оқуған. Бирақ, аилә шараитиға бола, дәсләп Челәктә, андин Қирғизстанниң Өзгән шәһиридә яшиған. Уруш башланған жили мошу шәһәрдин җәң мәйданиға атланған.

1944-жили Одер дәриясидин өтүш үчүн болған җәңләрдә көрсәткән җасарити үчүн Кеңәш Иттипақиниң Қәһримани атиғи берилиду. Уруштин кейин Әнҗан шәһиридә партия-егилик органлирида вә сода саһасида җавапкәрлик лавазимларда ишлигән.

Дадаш БАБАҖАНОВ

(1922 — 1985)

Алмута вилайити Җамбул наһийәсиниң Узунағаш йезисида дунияға кәлгән. Мошу йезидики Крупская намидики қазақ оттура мәктивини пүтириду. 1941-жили Қизил армия сепигә чақиртилиду.

Севастополь шәһирини азат қилиш җәңлиридә көрсәткән җасарити үчүн СССР Алий Кеңиши Президиуминиң 1945-жили 24-марттики Пәрманиға бенаән, Кеңәш Иттипақиниң Қәһримани намиға сазавәр болиду.

Уруштин кейин партия-егилик органлирида җавапкәрлик хизмәтләрни атқурған.

Мөрдүн ТЕЙИПОВ

(1918 — 1998)

Алмута вилайити Уйғур наһийәсиниң Чоң Ачиноқа йезисида туғулған. 1941-жили җәң мәйданиға атлинип,  Панфилов дивизиясиниң 10-атқучилар полкида хизмәт қилиду. Ғалибийәтни Берлинда қарши елип, андин Жирақ Шәриқтә япон милитаристлирини тар-мар қилиш җәңлиригә қатнишиду. ІІ вә ІІІ дәриҗилик «Шөһрәт» орденлири вә башқиму орден-медальлар билән мукапатланған.

1995-жили Улуқ Ғалибийәтниң 50 жиллиғи мунасивити билән Қазақстан Җумһурийитиниң «Халық Қахарманы» жуқури атиғи берилгән.

Һазир өзи уруштин кейин узақ жиллар устаз болуп ишлигән Кичик Дехан оттура мәктиви, Чонҗа йезисидики кочиларниң бири униң нами билән  атилиду.