• УЙҒУР АВАЗИ
• 17 Мамыр, 2010

Униң билән жутдашлири пәхирлиниду

Алим ака Әзизовни Яркәнт тәвәсидә тонумайдиғанлар камдин-кам учришиду. Чүнки униң җәңгиварлиқ йоли җасарәткә толуп-ташқан. Течлиқ әмгәк мәйданидиму аброй-атаққа бөләнгән. Мана шуниң үчүнму жутдашлири униң исмини пәхирлиниш билән тилға алиду.

Йеши тохсәндин алқиған мөтивәрниң һаяти кейинкиләр үчүн һәқиқәтәнму ибрәтлик. Улуқ Вәтән уруши башлиниши биләнла у дәсләпкиләрдин болуп мәйданға атлиниду. Алмута вә Ашхабад шәһәрлиридә кичик командирларни тәйярлайдиған курсларда оқуп, 1942-жилниң оттурилирида танкиға қарши расчетниң командири сүпитидә җәңләргә қатнишиду. Украина вә Латвия территориялиридә болған җәңләрдә қәһриманлиқниң һәқиқий үлгисини көрситиду. ІІ вә ІІІ дәриҗилик Шөһрәт орденлири билән мукапатланғанлиғи әйнә шуниң рошән испати. Урушниң ахирқи жили февраль ейида йүз бәргән шиддәтлик җәңләрниң биридә көрсәткән җасарити үчүн І дәриҗилик Шөһрәт ордениға тәвсийә қилиниду. Әпсуски, қандақту-бир сәвәпләр билән уйғур җәңчиси бу мукапатқа  еришәлмәй қалиду.

1946-жили көксигә җәңгивар орден-медальларни тақиған Алим ака туғулуп өскән жутиға қайтип келиду. Җәңләрдә алған җараһәтлиригә қаримастин, течлиқ әмгәккә бирдин арилишип кетиду. Ениғирақ ейтқанда, «Панфилов» йәл-йемиш совхозида, кейинирәк балилар өйидә бухгалтер болуп, та һөрмәтлик дәм елишқа чиққичә үлгилик хизмәт қилиду.

Мана мошундақ ибрәтлик һаят йолини бесип өткән Алим ака билән әмгәк коллективлирида, оқуш орунлирида пат-патла учришишлар өткүзүлүп туриду. Мошу йеқинда Билал Назим намидики оттура мәктәпкә болуп өткән учришиш әйнә шулар җүмлисидиндур. Мәктәпниң башланғуч һәрбий тәйярлиқ пәни муәллими Мурат Һәмраевниң уюштуруши билән өткән бу баш қошушта наһийәлик уруш вә әмгәк ветеранлири кеңиши рәисиниң орунбасари Сергей Кәримов, «Нур Отан» ХДПниң наһийәлик шөбисиниң мәслиһәтчиси Қуат Бабақов вә муәллимләр сөзгә чиқип, ветеран һәққидә өзлириниң сәмимий пикир-инкаслирини изһар қилди. Шундақла сабиқ җәңчиниң шәрипигә шәһәр мәктәплириниң жуқарқи синип оқуғучилири арисида нишанға милтиқ етиш бойичә мусабиқә уюштурулди.

Учришиш меһмини өзиниң һаят йоли тоғрилиқ сөзләп берип, оқуғучилар тәрипидин қоюлған соалларға җавап қайтурди. Балиларниң яхши оқуп, җәмийитимизгә мунасип адәмләрдин болуп йетилип чиқишиға тиләкдашлиқ билдүрди.

Нурәхмәт ӘХМӘТОВ.

Яркәнт шәһири.