• УЙҒУР АВАЗИ
• 17 Мамыр, 2010

Дадам билән кичик дадамни әслигәндә

Улуқ Вәтән урушиға бизниң Чоң Ақсу йезисидинла 482 адәм қатнашқан екән. Уларниң тәң йеримидин көпирәги җәң мәйданлирида қаза болуп, 229 адәмгә жутиға аман-есән қайтип келиш несип болған екән. Һазир, тәләйгә қарши, уларниң пәқәт бир-иккисила һаят.

Қолумға қәләм елип, һәммимизниң сөйүмлүк нәширигә айланған «Уйғур авази» гезитиға мошу хәтни йезиватқинимниң сәвәви, Улуқ Ғалибийәтниң 65 жиллиқ сәнәси мунасивити билән җәң мәйданлирида Вәтән азатлиғи вә бизниң парлақ келәчигимиз үчүн күрәшкән һәм әзиз җанлирини қийған дадам Илахун Азнибақиев билән кичик дадам Савут Палтаевни йәнә бир қетим әскә елиштин ибарәт, халас.

Дадам Илахун Азнибақиев 1914-жили Чоң Ачиноқа йезисида туғулған. У хәлқимизниң пәхригә айланған Махмут Ғоҗамияровниң йеқин ағиниси болған екән. Шуңлашқа болса керәк, 1937-жили М.Ғоҗамияров дадамни Чоң Ақсуға — өзи башқуруватқан МТСқа ишқа тәклип қилиду. Мошу йәрдә ишләп жүрүп, чоңақсулуқ Мәликәм Палтаеваға өйлиниду. Уруш башланғанда дәсләпкиләрдин болуп мәйданға атланған дадам Ғалибийәтни Берлинда қарши елип, мәйдисини бир нәччә орден вә медальлар билән безәп қайтиду. У күни бизниң аилидә мәйрәмлик кәйпият һөкүм сүргән екән. Чоңларниң ейтишичә, жутимизға биридин кейин бири келишкә башлиған сабиқ җәңчиләрни қарши елиш һәқиқий мәйрәмни әслитәттекән. Лекин уларниң бесим көпчилиги нака болуп, саламәтлигидин айрилған еди. Шуниң кесиридин уларму, мәйдандин бир-бирләп қайтқиниға охшаш, биридин кейин бири вапат болушқа башлайду. Дадамму 1966-жили 52 йешида вапат болиду.

Әнди кичик дадам Савут Палтаев болса, 1920-жили мошу Чоң Ақсу йезисида туғулған. 1939-жили армия сепигә чақиртилип, фин урушиға қатнашқан. 1942-жили шиддәтлик җәңләрниң биридә еғир яридар болуп, госпитальда вапат болғанлиғи тоғрилиқ «қара хәт» кәлгән.

Бийил — Улуқ Ғалибийәтниң 65 жиллиғини нишанлаватимиз. Шундақ екән, биз мундақ пәйтләрдә, инсанийәт тарихидики әң дәһшәтлик урушта җенини қийған әзиз инсанлиримизни әсләп, уларниң роһиға тазим қилишни алий инсаний пәрзимиз, дәп билишимиз шәрт. Бу хәтни йезишимдики йәнә бир мәхсәт әйнә шуниңдин ибарәт.

Җәнәм ИЛАХУНОВА.

Чоң Ақсу йезиси, Уйғур наһийәси.