- АҚПАРАТ АҒЫНЫ
- 07 Сәуір, 2017
Полицейді видеоға түсіруге заңмен рұқсат етілмек
Елімізде «Жол жүру қозғалысы» туралы заң тағы өзгергелі жатыр. Кезінде өздері дауыс берген даулы құжатты бастан-аяқ түзетіп жатқан депутаттар оны қайта талқыға салмақ. Мәжілісмендердің ұсынысы бойынша, енді жолаушыларға полицейлердің мақұлдауын күтпей көліктен шығуына рұқсат етілуі тиіс. Жүргізушілер сақшылардың әрекетін рұқсатсыз-ақ таспаға жаза алады, деп хабарлайды КТК.
«Оған өзгерту енгізу үшін Үкіметтің нормасы керек. Сондықтан осындай норма заңда болмаған соң біз оны қараған жоқпыз. Бұл ереже сол қалпында қалды», - дейді Мәжіліс депутаты Қанат Мусин.
Осыдан екі жыл бұрын, депутаттар жолаушылардың да еркіндігін шектеген болатын. Енді қате бастық, салондағы адамдар полицейлердің бас изеуін күтпей көліктен шығуы тиіс деп отыр. Бірақ жүргізуші бұйрық берілмейше, қозғалмауы керек. Сондай-ақ,жүргізуші куәлігін жоғалтқан, не мерзімін өткізіп алған азаматтар енді қайта емтихан тапсырмайды. Бірақ медициналық тексерістен өтуден бас тартқан адам 3 жылға құжатынан айырылады. Ішкі Істер министрлігі бұдан былай балаларына куәлікті сыйлық ретінде әперетіндермен де шындап күреспек.
«Қала тұрғындары жақын маңдағы елді мекендердегі тіркеу-емтихан бөлімшелеріне барып жүргізуші куәлігіне емтихан тапсыратын. Енді бұған тыйым салынады. Барлығы арнайы халыққа қызмет көрсету орталықтарына барып ғана құжат алуы керек», - дейді ҚР ІІМ Әкімшілік полиция комитетінің төрағасы Игорь Лепеха.
Тіпті рөлге мас күйінде отырған мүгедектердің бірден куәлігі тартып алынады. Мұндай талап бұрынғы заңда болмаған. Қысқасы, мұның бәрі ұсыныс қана. Қателіктерін енді түсінді ме, әйтеуір депутаттар өздері 2 жыл бұрын бекіткен құжатқа қайта 55 түзету енгізгелі жатыр. Ал даулы заң жобасы алдағы сәрсенбіде Мәжілістің жалпы отырысында қаралмақ.
566 рет
көрсетілді0
пікір
