• УЙҒУР АВАЗИ
• 13 Маусым, 2011

Аниларға һөрмәт көрситилди

Наһийәдә өмүргә әвлат кәлтүрүп, җәмийитимизгә мунасип адәмләрни тәрбийиләп, қатарда қошуватқан анилар көпләп санилиду. Уларниң арисида нурғун бала тепип, тәрбийиләш билән бир қатарда, өз мутәхәссислиги бойичә әмгәк қилип, наһийәниң иҗтимаий-ихтисадий тәрәққиятиға тегишлик һәссә қошуп келиватқанларму аз әмәс. Әгәр рәқәмләргә көз жүгәртидиған болсақ, буниң һәқиқәтәнму шундақ екәнлигигә толуқ ишәнчә һасил қилишқа болиду. Мәсилән, төрттин көп пәрзәнт көрүп, қатарға қошуватқанларниң сани 1700дин ешип кетиду. Әнди 400дин ошуқ ана бәштин артуқ пәрзәнт көргән. Наһийә бойичә 1057 ана «Күмүч һалқа» тақиған болса, 886 ана «Алтун һалқа» елишқа муйәссәр болған. Наһийәдә көп балилиқ анилар саниниң тез сүръәт билән өсүватқанлиғини тәкитлигән орунлуқ. Бу яркәнтликләрниң иҗтимаий-ихтисадий шараитиниң яхшилиниватқанлиғини көрситиду, әлвәттә.

Йеқинда наһийәлик Мәдәнийәт өйидә Яркәнт шәһири билән барлиқ йеза округлиридин көп балилиқ анилар иштрак қилған жиғин болуп өтти. Униңда наһийә һакими Ермек Келемсеит көп балилиқ аниларниң чоң топиға күмүч вә алтун һалқиларни тәнтәнилик рәвиштә тапшуруп, һөрмәт билдүрди. Шундақла аниларға гүлләр тәғдим қилинип, уларниң намиға яхши тиләк-истәкләр ейтилди. Әнди наһийә сәнъәтчилири болса, өзлириниң йеқимлиқ нахша-сазлирини шу нураний аниларға беғишлиди.

Нурәхмәт ӘХМӘТОВ.

Панфилов наһийәси.