Һаятта – кәмтар, гиләм үстидә қәйсәр

Һаятта һәрхил адәмләрни учритимиз. Бирлири атақ-аброй, шан-шөһрәткә амрақ кәлсә, бәзилири кәмтар, камсөзлүк, амма әмгәкчан һәм миннәтсиз җанлар. Биринчи мисалимдики адәмләр өзлирини «реклама» қилғуси келип, «гезитқа мени язсаңмамду?» дәп бетиңгә уялмай ейтиду.Һә, әнди ушбу мақаләмниң қәһримани тиришчан һәм һөрмәткә лайиқ Абдуғени ака Исмайилов ундақлардин әмәс. Наһайити кәмтар вә камсөзлүк. Мени униң билән миллий мәдәнийитимизниң җанкөйәри, тонулған врач Мурат ака Ибрагимов тонуштурди. Мән уни гезитханлиримизға тонуштурушни тоғра көрдүм.

Әслидә кәмтар кишиләрдин өмүр сәһиписи һәққидә сорисаң, қисқичила, бир еғиз сөз биләнла йәткүзиду. Абдуғени акиму  худди шундақ екән. Шуңлашқа мәшиқләндүргүчи, сабиқ спортчи Абдуғени Абузар оғли һәққидә Мурат акидин көпирәк  билишкә тоғра кәлди.

У 1957-жили тарихий вәтинимизниң Ғулҗа шәһиридә дунияға кәлгән. Икки яшқа киргәндә аилиси билән Қазақстанға көчүп чиқиду вә Челәк йезисиға орунлишиду. Киров намидики  вә «50 лет Октября» оттура мәктәпләрдә билим алди. Кейинки  билим дәргаһида оқуп жүргән чағлирида әркин күрәш бойичә спорт секциясигә қатнишип жүриду. Спортқа, шу җүмлидин әркин күрәшкә қизиқиш-тәлпүнүши зор Абдуғенини тәҗрибилик мәшиқләндүргүчи Асан Тоққожаев байқап қалиду вә яш палван билән мәшиқ қилишқа башлайду. Абдуғени дәсләп мәктәп ичидики турнирларға иштрак қилип, өз  күчини синайду. Бара-бара тәҗрибә топлиған у наһийәлик мусабиқиләргә қатнишип, алдинқи орунлардин көрүниду.  Болупму у Яшлар спорт мәктивиниң күмүч медалиға сазавәр болғанлиғини дайим әскә алиду.

– Бу мениң тунҗа  утуғум еди, – дәйду биз билән болған сөһбәттә у. – Мана шуниңдин етиварән мениң спорттики  йолум башланди десәм ашурувәткәнлигим әмәс.

Бәзиләр Абдуғени акиниң жугач-кәмтарлиғини көрүп, «Спортчи болған һаләттиму, бу мүҗәзи билән қандақ ғалип атилип жүрди?» дәп қелиши мүмкин. Лекин Абдуғени ака гиләм үстидә җиддий һәм қәйсәр мүҗәз көрситишкә қабил һәқиқий палван болған екән. Һәрхил жилларда  көплигән турнирларға қатнашқан яш палван олҗилиқ  болди. Буниңға униң архивида сақланған диплом-медальлар дәлил-испат болалайду. Шуниң үчүн болса керәк, спортта тәҗрибиси мол Абдуғени Исмайилов 1980-жили Челәк йезисидики Балилар вә өсмүрләр спорт мәктивидә мәшиқләндүргүчи болуп хизмәткә орунлишиду. Та 1996-жилғичә у нурғунлиған палванларни тәрбийиләп, чемпионларни  тәйярлиди. Андин у «Лачин» спорт комплексиға ишқа орунлишиду. Бу йәрдиму  тилға аларлиқ утуқларға қол йәткүзүп,  көпчиликниң алқиш-һөрмитигә сазавәр болалиди. 2006-жили Әмгәкчиқазақ наһийәлик Балилар вә өсмүрләр спорт мәктивигә хизмәткә тәклип қилинип, баш мәшиқләндүргүчи болуп ишләватиду.

«Йопурмақсиз – дәрәқ, шагиртсиз устаз болмайду» дегәндәк,  Абдуғени Исмайиловму өзиниң Арман Жаканов,  Вячеслав Макаров, Нажмудин Қудайбергенов, Дилмурат Турсунов, Дастан Өмирзақ, Адиләм Үсәнова, Аделья Мелис, Анайәт Зәйнавдинов охшаш шагиртлири билән һәқлиқ йосунда пәхирлиниду. Улар һәрхил җумһурийәтлик вә хәлиқара мусабиқиләрниң  ғалиплири  атилип, мәшиқләндүргүчисиниң бешини көккә йәткүзди. «Спорт маһирлиғиға намзат» вә «Спорт маһири» атақлириға еришти. Йәнә бир шагирти – Қазақстан биринчиликлиридә үч күмүч, үч бронза медалъниң, хәлиқара турнирларда  икки  күмүч медалъниң саһиби, «Алтун бәлбағ» егиси, Қазақстан талланма командисиниң әзаси Әйнурәм Һашимова һазир Тәйвәндә өтидиған Азия оюнлириға тәйярлиқ көрүватиду. Мошуларниң барлиғи Абдуғени  Абузар оғлиниң көпжиллиқ әмгигиниң мевиси.

– Абдуғени Исмайиловниң наһийәмизниң спорт саһасиға қошқан үлүши  алаһидә, – дәйду Мурат ака. – Шуңлашқа униң һаят йоли, әмгәк-әҗри бүгүнки һәм кәлгүси яш әвлатқа үлгә-нәмунә болғуси.

Ейтмақчи, бурнакүн һаятиниң 45 жилини спортқа беғишлап, йүзлигән яш спортчиларни тәрбийилигән, онға йеқин «Спорт маһири» вә «Спорт маһирлиғиға намзатларни» йетилдүргән Абдуғени акиниң  60 яшлиқ тәвәллуди тәнтәнилик атап өтүлди. Униңға уруқ-туққанлар билән  дост-яранлиридин ташқири устазлири, хошнилири һәм җәмийәтлик ишларниң активистлири, шагиртлири қатнашти. Ақсақаллар билән нураний анилар тәвәллуд егисигә дуалирини яғдуруп, изгү тиләклирини билдүрди. Балилиқ дәвридә спорт залида тонушуп, талай мусабиқиләргә  биллә барған достлири Абдуғени акиға һөрмәт йүзисидин ат миндүрди. Җумһурийәтлик Уйғур этномәдәнийәт мәркизи рәисиниң орунбасари, Әмгәкчиқазақ наһийәлик Уйғур этномәдәнийәт мәркизиниң рәиси Сулаймән Мәхсүтов вә униң орунбасари Майдин Абдуллаев ҖУЭМниң Пәхрий ярлиғи билән «Қарулы күштерінің ардагерлері» җәмийәтлик бирләшмисиниң «Отан патриоты» медалини тапшурди.

Абдулҗан АЗНИБАҚИЕВ. Әмгәкчиқазақ наһийәси.




Добавить комментарий

Ваш e-mail не будет опубликован. Обязательные поля помечены *