Қазақстан балеті тұңғыш рет Монакода

1055

2018 жылғы қыркүйектің 14 мен 15 күндері «Астана балет» Монако княздігінде балет кештерін өткізді. Бұл шара Мәдениет және спорт министрлігінің мұрындық болуымен, «Рухани жаңғыру» ұлттық бағдарламасының «Жаһандағы заманауи Қазақстан мәдениеті» жобасының аясында ұйымдастырылып, түрлі жанрдағы хореография өнері паш етті.

«Еліміз хореография өнерін Монако княздігінде тұңғыш рет көрсетпекші. «Астана Балет» театрының Grimaldi Forum ірі орталығының сахнасында өнер көрсетуі Астанамыздың 20 жылдық мерейтойына орайластырылып отыр. Осы уақыт аралығында елордамыз Еуразия кеңістігіндегі қоғамдық-саяси және мәдени өмірдің орталығына айналып үлгірді. Біздің би труппамыздың балет спектаклі Оңтүстік Еуропаның ғажайып қаласының тұрғындары мен қонақтарына тосын сый болар деген үміттеміз», — деп атап өтті, театр директоры Валерий Күзембаев.

«Астана Балет» театрының қолтаңбасы бай классикалық мұра мен заманауи балет өнерінің негізінде қалыптасып, соның арқасында ұлттық биді дамытып, оны жаңа деңгейге көтеріп күллі әлемге паш ету мүмкіндігі туды. Театр қазақ биін зерттеу мен оны заманға сай ой елегінен өткізуге ерекше мән беріп, ұлттық бидің пластикалық үйлесімділігі мен көркін аша түсетін тың хореографиялық миниатюралар шығарып келеді.

Ұлттық хореографиялық пластика – қазақ мәдениетінің даралығын танытудың негізгі тәсілдерінің бірі. Сол себепті, ұлттық би «Астана Балет» атты жас театрдың барлық гастрольдік сапарларына әр береді. «Астана балет Гала» концерттік бағдарламасының би композициялары – қазақтың байтақ даласының, бай халық дәстүрінің, ғажап музыка мен қайталанбас көркем бейнелердің өрнегі. Қазақ болмысын би тілімен баяндайтын этнографиялық баян концерттік бағдарламаның ажарын ашып қана қоймай, елімізде де, шет елдерде де зор қошеметпен қабылданатын қойылым.

Ұлттық тақырыптан бөлек, көрермен қауым театр репертуарындағы Рикардо Амаранте қойған неоклассикалық спектакльдердің үзінділерін тамашалады. Оның «Love Fear Loss, «A fuego lento» балеттері көрерменнің ыстық ықыласына бөленіп келеді. Балетмейстердің қайталанбас пластикалық тілі — ерекше нәзік қойылымдарынан аңғарылып тұрады.

Гастрольдік сапарлары кезінде «Астана Балет» театры, алдына күрделі міндет қояды: би тілі арқылы елімізді және оның сан-қырлы өнерін паш ету.




One thought on “Қазақстан балеті тұңғыш рет Монакода

  1. Танакөз

    Біздің балет әлі де шетелді бағындырмақ. Бұйырса, сол күнге жетелік.

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *