Алматылықтар egov.kz арқылы тіркеуге тұра бастады

533

Алматылықтар мекенжай бойынша тұрақты тіркеуге тұру үшін ХҚО-ның онлайн баламасы – egov.kz таңдай бастады.

Биылғы жыл басынан бергі көрсеткіш бойынша онлайн түрде мекенжей тіркеуіне тұрушылар саны біршама өскен. Бұл қызметті алу үшін 39462 адам фронт-офистерге жүгінсе, 20873 азамат ешқайда бармай-ақ онлайн түрде жүзеге асырған.

Былтырғы көрсеткіштерді есепке алатын болсақ, Алматы қаласындағы «Азаматтарға арналған үкіметтің фронт-офистері арқылы 216196 адам, онлайн түрде 43967 адам тіркеу рәсімін жүзеге асырған.

Республика бойынша 1,5 млн адам фронт-офистер арқылы, онлайн түрде 479 мың адам тіркеу рәсімін жүзеге асырған, сәйкесінше әр төртінші азамат тұрғылықты тіркеу рәсімін электронды түрде жүргізген.  Бұл тізімде Алматы қаласы 7-орынға тіреліп, 13,49%  пайызды құрап отыр.

Айта кету керек, 2019 жылдың маусымынан бастап азаматтарды тұрғылықты жері бойынша тіркеу қызметтерін пилоттық режимде «Азаматтарға арналған үкімет»мемлекеттік корпорациясының қызметкерлері жүзеге асырады.

«Пилоттық жоба алматылықтарға бірқатар артықшылықтар берді. Атап айтар болсақ, фронт-офистердің жұмыс кестесіне сәйкес азаматтарды тіркеу бойынша қызмет көрсету, яғни түскі үзіліссіз сағат 9.00-ден 20.00-ге дейін, көші-қон полициясының деректер базасында тіркеуге мүмкіндігі бар қызметкерлер санын арттыру, тіркеу бойынша қызметке кезекті қысқарту сияқты үдерістерді қолға алудың арқасы», — дейді «Азаматтарға арналған үкімет» МК КЕАҚ Алматы қаласы бойынша филиалының PR-менеджері Жаңыл Әпетова.

Бүгінде мекенжай тіркеуін жасату үшін тіркеуге қоюшы және тіркелуші тараптың ЭЦҚ-сы болуы тиіс. Азамат egov.kz-ке тіркелетін мекенжай мен жеке мәліметтерін жазса, баспана иесі оған рұқсатты жеке кабинетіне келген сұрауды мақұлдау арқылы береді.

 




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *