• Таным
• 11 Мамыр, 2022

Тіл білімінің болашағы талқыланды

Алматыдағы Ұлттық кітапханада ҚР Ұлттық ғылым академиясы, А.Байтұрсынұлы атындағы Тіл білімі институты мен Қайнар академиясының ұйымдастыруымен ҚР Ұлттық ғылым академиясының академигі Кәрімбек Құрманәлиевтің 60 жылдық мерейтойына орайластырылған  "Қазақ тіл білімінің бүгіні мен болашағы" атты дөңгелек үстел  болып өтті.

Басқосуда қазақ тіл ғылымының қазіргі жағдайы мен болашағы туралы және тіл білімін дамытудың жаңа бағыттары жайлы көкейкесті мәселелер талқыланды.

Ғылыми жиынға Ұлттық ғылым академиясының Президенті Мұрат Жұрынов бастаған Зейнеп Базарбаева, Кәрімбек Құрманәлиев, Шерубай Құрманбайұлы сынды Ұлттық ғылым академиясының академиктерімен қатар, белгілі тілші-профессорлар Анар Салқынбай, Жаңалық Балтабаева, Раушан Аваковалар баяндама жасады.

Іс-шара аясында академик Кәрімбек Құрманәлиевтің “Қазақ тіліндегі сөзжасамдық ұя: теория және практика” атты кітабы таныстырылды.