• УЙҒУР АВАЗИ
• 13 Маусым, 2011

Сәясий тәқипләшләр қурванлириниң хатирисигә беғишланди

Сәясий тәқипләшләр қурванлирини хатириләш күни Панфилов наһийәсидиму атап өтүлди. Бу күни Яркәнт шәһири билән Кичик Чиған йезиси арилиғидики «Бәш терәк» дегән йәргә наһийә рәһбәрлири вә җамаәтчилик вәкиллири жиғилип, әшу дәһшәтлик жилларда наһәқтин-наһәқ тәқипкә учрап, қурван болғанлар хатирисигә орнитилған ядикарлиққа гүлчәмбәрләрни қойди. Матәм митингида наһийә һакими Ермек Келемсеит, Билал Назим намидики оттура мәктәпниң мудири, вилайәтлик мәслиһәтниң депутати Санийәм Зулиярова вә башқилар сөзгә чиқти. Тәқипләшләр қурванлириға беғишланған шеирлар оқулуп, уларниң роһиға қуръан тилавәт қилинди.

Митингидин кейин хатириләш чарә-тәдбири шәһәрдики Сидиқ Зулияров намидики кочида давамлашти.

Сидиқ Зулияров Қазақстандики уйғур маарипиниң шәкиллинип, тәрәққий етишигә салмақлиқ һәссә қошқан атақлиқ мәрипәтчи еди. Панфилов вә Уйғур наһийәлиридә дәсләпки мәктәпләрниң ечилип, хәлиқ маарипи ишиниң йолға қоюлуши униң исми билән бағлиқ. Саһани тәрәққий әткүзүш үчүн әқил-идрәк, пәм-параситини сәрип қилип, пүтүн вуҗуди билән әстаидил хизмәт қиливатқан бир пәйттә тәқипләшкә учрайду. Он жил һаяти Сибирь лагерьлирида өтиду. Бу азлиқ қилғандәк, йәнә сәккиз жил сүргүндә жүриду. Соғулмас ғәйрәт-шиҗаәт вә сунмас ирадиси түпәйли жутиға аман қайтип келиду. Өз һаятиниң асасий мәзмуни болған педагогика саһасидики паалийитини давамлаштуриду. Өмриниң ахириғичә әвлат тәрбийиләш билән шуғуллинип, мәктәпләргә рәһбәрлик қилиду.

Сидиқ Арзу оғлиниң маарип саһасидики әмгиги өзиниң мунасип баһасини тапқан. Шәһәрдики чоң бир кочиниң униң нами билән атилип, исминиң әбәдийләштүрүлүши мошу пикирниң рошән испати.

Бу йәрдә сөзгә чиққан наһийә һакими Ермек Келемсеит, наһийәлик Уйғур мәдәнийәт мәркизиниң рәиси Реһимҗан Тохтахунов, наһийәлик Уруш вә әмгәк ветеранлири кеңишиниң рәиси Сағымбек Үшбаев, наһийәниң Пәхрий граждани Сергей Кәримов, наһийәлик мәслиһәтниң кативи Тлеуберген Оспанов, Қазақстан Җумһурийитиниң хизмәт көрсәткән муәллими Әхмәтҗан Надиров, пешқәдәм педагоглар Нурбанум Кулинова, Батима Иманқулова вә башқиму мәрһумниң кәсипдаш-шагиртлири мәрһум тоғрилиқ хатирилири билән ортақлашти.

Ахирида С.Зулияровниң бала-җақилири намидин нәзир берилди.

Нурәхмәт ӘХМӘТОВ.

СҮРӘТТӘ: хатириләш чарә-тәдбиридин көрүнүш.

Турсунмәһәммәт МӘШҮРОВ чүшәргән сүрәт.